Nagapati ang siyentipiko nga ang mga kuring may mga karakter nga makabuhin sang stress kag anxiety sa mga tawo. Isa sa mga rason ang pagka mahinampangon sang mga kuring. Sila handa gid pirme nga maghampang sa imo biskan ano oras, samtang nagaluto ka, naga-ubra sang ulubrahon sa iskwela ukon biskan yara ka pa sa banyo. Makita mo sila nga nagalakat sang mahinhin padulong sa imo kagat nila ang ila hampanganan, sinyales nga gusto nila maghampang sa imo. Kun mawili sa paghampang ang mga kuring, makadlaw ka na lang sa mga hulag kag mga huni nila nga daw mga buang. Bal-an man naton nga ang pagkadlaw amo ang unibersal nga stress reliever.
Kun ang mga kuring maka simhot sang catnip, daw gina sapi-an sila nga naga ligid-ligid kag naga nus-nus sang ila guya sa salog. Daw makahalam-ot nga talan-awon kag maka pakadlaw sa imo sang tudo-tudo asta malimtan moa ng imo mga problema.
Wala labot sa pagkamakulit, ang mga kuring may yara man sang karakter nga pagkasiryuso kag pagkahuloy. Inusnus nila ang ila guya kag ulo sa imo man nga guya kag magapungko sila sa imo mga pa-a samtang gahulat sila nga husayon mo ang ila mahumok kag mabalahibo nga likod. Ang mga kuring indi mahilig mag pa kuskos sang ila tiyan pareho sa mga ido. Ang tiyan sang mga kuring ang pinaka sensitibo sa ila, kun makita mo sila nga naga kaya-kaya mag tulog ukon sila naga pakita sang ila tiyan sa imo, buot silingon nabatyagan nila ang kahilway sa imo kag wala sila nahadlok sa imo presensya.
Mas indipendiente ang mga kuring kaysa sa mga ido, kay pwede mo sila ya mabilin sa imo panimalay biskan sa malawig pa nga tini-on. Maka pakalipay ka sa imo bakasyon nga wala may gina isip nga hilimuson sa imo balay tungod sa gina pang pang-it sang ido. Apang naga salig man ang kuring sa mga tawo nga magpakita sang gugma sa ila.
Ang pinaka manami nga karakter sang kuring ang pagka kalmado nila. Indi sa tanan nga oras gusto nila mag hampang, kun kis-a gusto lang nila mag pungko kag mag hidga sa tupad mo samtang ikaw naga basa sang paborito mo nga libro. Kabalo sila kun san-o mag pahuway kag kun sila man naga tulog, mas muok pa ang tulog kaysa sa imo. Kis-a magatulok sila sa imo sang madalom kag hinay-hinay nga magapamisok, amo ni ang ila pamaagi nga maghambal sang “palangga ta ka”.
Wala sang dako nga ekspektasyon sa imo ukon ikaw man sa ila kay bal-an mo nga sapat sila, lain sa mga tawo nga kaupod mo adlaw-adlaw. Wala naga pangayo gid sang dako sa imo ang mga kuring, sakto na ang isa ka yahong nga pagkaon nga may halo sang pagpalangga.
Isa ka hambalanon halin kay Stuart Mcmillan; “a meow massages the heart.” Ang maalugaynay nga paghuni sang kuring samtang naga tawag sa imo daw ili-ili halin sa kalangitan, daw gina tunaw ka sang pagpalangga sa ila samtang gapamati. Magpauli ka halin sa malawig kag makapoy nga ubrahanay, makita mo ang imo kuring nga gina sugata ka, naga taas ang ila ikog kag dulunggan ga pakita nga daw handa sila mamati sang imo nga istorya. Sila ang katawhay kay kalinong nga kinahanglan mo sa kada katapusan sang adlaw kay ang mga kuring maka bulig gid sa pagbuhin sang stress nga nabatyagan mo sa gamay nga pamaagi nga bal-an nila.
Isabela D. 