Pavia LGU naglunsar sang COVID-19 Vaccination roll out para sa mga Senior Citizens

COVID-19 Vaccination roll-out para sa mga Senior Citizens ginlunsar sang Pavia LGU sa apat ka vaccination sites sang Enero 31.

Sa Parc Regency Covered Court, gina banta nga yara sa 200 ka indibidlwal halin sa barangay sang Pandac, Balabag kag Jibao-an ang nag kadto para mag pa bakuna kag mag pa booster shot kontra sa COVID-19. Kadamoan sa nagkadto ang mga residente sang Brgy. Balabag Pavia.

Suno sa isa ka opisyal nga akon na interbyu, gamay lang ang nag abot nga taga Pandac kag Jibao-an kay halos tanan nga residente sang sina nga barangay ang mga bakunado na.

Isa sa mga nagkadto sa vaccination site si alyas Inday nga gin-updan ang iya nga lola para mag pa booster shot. Iya gin saysay ang importansya sang bakuna para sa mga tigulang: “Para indi gid sila ma tam-an sa COVID-19, kay bal-an ta man nga mas taas ang risk sa mga tigulang kaysa sa aton.”

4 ka vaccination sites para sa pumuluyo sang kada barangay sa Pavia ang gin preparar sang Pavia LGU para sa RESBAKUNA “BAKUNAHAN PARA KAY LOLO KAG LOLA”. 1. Pavia Multi-Purpose Gymnasium: Purok I, Purok II, Purok III, Purok IV, Cabugao Sur, Anilao, Pagsanga-an, Tigum kag Cabugao Norte. 2. Parc Regency Covered Court: Pandac, Balabag kag Jibao-an. 3. Pal-agon Gym: Mali-ao, Pal-agon kag Amparo. Kag 4. Robinsons Palce Pavia: Aganan, Ungka I kag Ungka II.

Gin hatagan sang prayoridad ang mga senior citizen samtang may yara man sang mga slots para sa 1^st dose, 2^nd dose kag booster shot para sa indi senior citizens.

Base sa datus sang nagligad nga tuig mas mataas ang numero sang mga Senior Citizen nga ginbawian sang kabuhi bangod sa COVID-19. Ang RESBAKUNA “BAKUNAHAN PARA KAY LOLO KAG LOLA” ang gin lunsar sang lokal nga ahensya sang gobyerno para matagaan sang prayoridad ang mga senior citizen nga mabakunahan kuntra sa COVID-19.